ATHENAEUM Romanum

ATHENAEUM Romanum

cuius mentio apud Iul. Capitolin. in Pertinace, c. 11. Pertinax eô die processionem, quam ad Athenaeum paraverat, ut audiret Poetam etc. Lamprid. in Alex. Seu. c. 35. Ad Athenaeum audiendorum et Graecorum et Latinorum Rhetorum vel Poetarum causâ frequenter processit. Capitolin. item in Gordianis c. 3. Ubi adolevit, in Athenaeo controversias declamavit, audientibus eum Imperatorib. et apud Stdonium Apollinarem saepius, locus fuit, quod nomen ipsum arguit, studiis Minervae sacer: cuius honori dicatam inibi fuisse aliquam aedem aut cellam ex eo quis coniciat, quod etiam Senatum haberi in Athenaeo mos fuit, uti refert Dio extremô Iulianô; Senatus autem nisi in Templo et loco per Augures constituto, haberi non potuit. Mirum tamen, causam appellationis petere Dionem, non ἀπὸ τῆς Α᾿θηνᾶς et Minervae aede; sed ab eo, quod illuc convenirent homines docti et Minervae sacris initiati. Quare fieri potest, ut nulla ibi eslet Minervae aedes: sunt enim res diversae, Templum et Aedes. Quam sententiam firmat Aur. Victor, cuius, sunt de Hadriano ista: Gymnasia Doctoresque curare occoepit: adeo quidem, ut etiam ludum ingenuarum Artitum, quod Athenaeum vocant, constitueret. Ubi videmus ludum ingenuarum Artium, non aedem Minervae, dici: hoc amplius vero ex isto Victoris unico loco discimus, Hadrianum Athenaei Romani conditorem fuisse et publicum illud opus struxisse. Casaubon. Not. ad Historiam Augustam, Capitolin. imprimis. Ab hoc porro Athenaeo omnia Auditoria postmodum nomen traxêre: in quibus, praeter dicta, Ducum Imperatorumque monumenta varia, ut epistolae, orationes, et similia, quae ad Historiam facerent, servari recondique consuevisse videntur Salmasio ad Pollionem in XXX. Tyrannis. c. 10. Vide quoque infra Musea, Panathenaicum.